Се туркаме со погледите во чекалните на возовите
што никогаш не тргнуваат.
вчера ги напишав буквите
од твоето име на ѕидот од едно wc …
Длабоки се твоите очи.
Барам нешто туѓо, за да можам да се населам и да продрам во тишината на некој туѓ живот.
… вчера ги собрав сите досегашни
спомени и ги фрлив во корпата
за отпадоци пред мојата зграда…
Се туркаме со времето
уморно чекајќи да нé одмине неспокојството.
… ги газевме прецизните бели линии
исцртани по булеварите …
… и тивко се доближувавме
до стрелките на часовниците …
… за да ја споиме присутноста
некаде на друго место….
(од поетската книга „Јас сум некаде на друго место“)
ЕМАНЦИПАЦИЈА НА СТИХОТ
… ова е извесна потреба
за ослободување на стихот
од секаква кохерентност …
Со пренапрегнати нерви
во неподносливи ситуации
од кои лесно се губи разумот
се претворам во реченица
без метафора
фрагментирани во осамата
се гушите во зборовите
„силниот е моќен
со својата самостојност“
патуваме низ времето
што скржаво нé одминува
мирисот на снег
остро навлегува
во порите на коските
движењата се побавни
бидејќи човекот само во
највозвишените моменти
– останува сам
како што Бог
– е самотен.
Нема краток миг на застој.
Стихот не е подготвен за тоа.
ДРАГАНА ЕВТИМОВА (Скопје), ги има објавено следните книги: „Постоењето на динамиката“ (поезија, 2005), „Јас сум некаде на друго место“ (поезија, 2011); „Фусноти по сеќавање“ (поезија, 2014); „Се гледаме наскоро. Е.“ (епистоларен роман, напишан заедно со визуелниот уметник Владимир Лукаш, 2017), „Растојанието меѓу две точки“ (хаику, 2018), „Концептот ’магичен реализам’ како културолошки феномен“ (магистерски труд), Скопје, 2020; „Антологија Игропис“, (антологија – дијалог, уредник), Скопје, Фуснота, 2020 и „Анонимус“, (поезија, дополнето издание), Скопје, Фуснота, 2021. Дел од нејзината поезија е објавена на повеќе јазици. Има учествувано на бројни книжевни фестивали. Учествувала на книжевни резиденции во регионот. Добитничка е на наградата „Антево слово“. Член на Друштвото на писатели на Македонија. Активно преведува од словенечки јазик.
